أفضل طريقه لمذاكرة الفيزياء

بسم الله الرحمن الرحيم

من أكتر الاسئله التى تطرح على معلم الفيزياء  هى

الفيزياء صعبه ومش عارف اذاكرها ... أعمل ايه ؟
أنا بذاكر حلو وبحس إن أنا فاهم بس  تانى يوم مش فاكر اى حاجه  ....
المسائل أفكارها كتير ومش عارف اذاكرها كلها  ولو ذاكرتها بنساها بسرعه
إزاى اذاكر الفيزياء  ؟

.....

أفضل طريقه لمذاكرة الفيزياء

أول حاجه لازم نأكد عليها هى مش ممكن أفهم حاجه أنا بكرهها ...  مش بقولك انك تحبها بس على الاقل  متكرههاش  وطبعا  كل أما تكون بتحبها هتصبر عليها وهتحاول تفهمها أكتر
بص معاى على الخطوات دى  وتملش منها لو سمحت
1- حدد انا عاوز ايه من دراسة الفيزياء  (مثل ( انا عاوز أنجح  -  عاوز أتفوق فيها  -  عاوز درجه نهائيه - عاوز أفهم وأتعلم - كل ده )   على حسب الى انت عاوزه لازم تبذل المجهود علشان توصل للى انت عاوزه
2- حاول انك تقرأ الموضوع (الفقره) قراءه سريعه قبل البدأ فى المذاكره مش أكتر من 5 دقائق للصفحه ومش أكتر من صفحتين
3- ذاكر بالتفصيل كل كلمه فى الكتاب (المذكره) ومتسبش اى كلمه من غير متفهامها (خليك رخم ..رزل .... فى كلمه يعنى كل كلمه )
4- لخص الدرس بخطك انت فى كراسه خاصه للتلخيص بس (0000لازم  الكلام يكون واضح بسيط  من غير تكرار ... القوانين واضحه )
5- القوانين والمعادلات الرياضيه مهمه جدا ..مش بس تحفظها لا كمان لازم تفهمها كويس جدا وتعرف ايه الثوابت الموجوده  والمتغيرات ... وايه الى ممكن يحصل عند تغير إحداها ( بالزياده أو النقصان )  ومتى تستخدم هذه العلاقات وطبق بنفسك القانون ده على اكثر من مثال .
6- عند حل المسائل إبدأ بالامثله المحلوله .... حاول تحلها بنفسك .... وبعدين حل المسائل غير المحلوله  بالتدريج من السهل للاصعب ..ولو مسأله صعبه معاك وحاولت فيها أكثر من مره ومعرفتش تحلها  ابعتها لنا  وان شاء الله نساعدك فيها ... بكل سرور
7- طبعا مفيش أى حاجه هتكون سهله من أول مره الموضوع محتاج تدريب وصبر وهدف واضح ... وتضحيه بالوقت والمتعه مع الاصدقاء والخروجات و............و..........و...........
8- اختيار الكتاب الصح ( أو المذكره ) الى هتذاكر منها  دى من أهم الحاجات الى لازم تاخد بالك منها كويس لانها هيترتب عليها حاجات كتير .....
9- قبل البدأ بالمذاكره  لازم ذهنك يكون صافى ( حاول تبدأ بقراءة القران -  او الصلاه   -  أو الدعاء  -...)  ودايما تخيل شعورك وشعور أهلك لحظة ظهور النتيجه
10- كل فتره قيم نفسك وادائك ولو حسيت ان فيه تقصير فى جزء معين حاول تحله ومتستناش على اى مشكله انها تتحل  لوحدها .  لو انت مغيرتش نفسك للافضل هتلاقى نفسك فى النهايه متأخر فى حاجات كتير مش فى الدراسه والتعليم بس

بالتوفيق للجميع ... ان شاء الله